Irreechaa 2017 (14)

የኢሬቻ በዓል ምንም ዓይነት ጉዳትና ግጭት ሳያስተናግድ በሰላም ተጠናቋል

 (ኦሮሚዲያ፣1 ጥቅምት  2017) የኢሬቻ በዓል ምንም ዓይነት ግጭት ሳይከሰት በሰላም መጠናቀቁን የኦሮሞ አባገዳዎች ኅብረት አስታወቀ። በቢሾፍቱ ከተማ ሆራ አርሰዲ በየዓመቱ የሚከበረው የኢሬቻ በዓል በተለየ ድምቀት ተከብሯል።

የበዓሉ ታዳሚዎች የልምላሜ ምልክት የሆነውን እርጥብ ቄጤማና አበባ ይዘው ወደ ሐይቁ  በመውረድ ነው አምላካቸውን በማመስገን በዓሉን ያከበሩት።

የኦሮሚያ አባ ገዳዎች ኅብረት ሰብሳቢ አባ ገዳ በየነ ሰንበቱ እንደገለጹት በዓሉ በሰላም ተክብሮ መጠናቀቁ ደስ እንዳሰኛቸው ነው።

አባ ገዳ በየነ እንዳሉት በበዓሉ ላይ ስድስት ሚሊዮን ህዝብ ይታደማል ተብሎ ይጠበቅ ነበር።  ሆኖም በበዓሉ  የተገኘው ህዝብ  ከሰባት ሚሊዮን በላይ የሚገመት  ነው።

“ይህ ሁሉ ህዝብ በአንድ ላይ በዓሉን አክብሮ ምንም ዓይነት ግጭትና የአካል ጉዳት ሳይደርስ መለያየቱ ትልቅ ስኬት” መሆኑን ገልጸው  ኅብረተሰቡ ላደረገው ትብብር ምስጋና አቅርበዋል፡፡

የሰላም አስከባሪ ወጣቶች አስተባባሪ ወጣት ለማ ገመቹ በበኩሉ  ወጣቶች በዓሉ በሰላም እንዲካሄድ  የተሰጣቸውን ተልዕኮ በስኬት ማጠናቀቃቸውን ገልጿል።

የህዝቡን ሰላምና ደህንነት ለማስከበር የተሰጣቸው ሃላፊነት ትልቅ መሆኑን የተናገረው ወጣቱ፤ “ለተሳታፊ ወጣቶች ቀጣይ ስራ ጥሩ ልምድ ይሆናቸዋል” ብሏል።

ከተለያዩ የአገሪቱ ክፍሎች የተገኙና በባህላዊ አልባሳት ያሸበረቁ አባ ገዳዎች፣ ወጣቶች፣ የተለያዩ የህብርተሰብ ክፍሎች ከሌሊቱ 11:00 ሰዓት ጀምሮ እሬፈና ወይም የምስጋና ስርዓት በማድረስ በሰላም ተመልሰዋል።

Leave a Reply

Your email address will not be published. Required fields are marked *