የእሬቻ በዓል በቢሾፍቱ በደማቅ ሁኔታ ተከበረ

(አዲስ አበባ መስከረም 20/2011) ኦሮሞ በየአመቱ በድምቀት የሚያከብረው የእሬቻ በዓል በዛሬው እለት በቢሾፍቱ ሆራ አርሰዲ ሀይቅ በድምቀት ተከብሯል፡፡

በበዓሉ እንደ ከዚህ ቀደሙ ሁሉ ከተለያዩ የአገሪቱ ክፍሎች የተወጣጡ ማህበረሰቦችና የውጭ አገር ጎብኚዎች ታድመውበታል፡፡

በዓሉ ኦሮሞዎች ፈጣሪያቸው ጨለማውን ክረምት አሳልፎ ወደ ጸደይ ብርሃን ስላሸጋገራቸው እርጥብ ሳርና አደይ አበባ ይዘው ፈጣሪያቸውን የሚያመሰግኑበትና የተነፋፈቁት ተሰባስበው በጋራ የሚያከብሩበት አውደ ዓመት መሆኑ ይነገርለታል፡፡

በዚህ ዕለት ክረምቱን አዝንቦ ምድሩን አረንጓዴ ላለበሰው፣ ወንዞችን በውሃ ለሞላው፣ ምንጮችን ላፈለቀው፣ ከብቶች እንዲረቡና እንዲፋፉ ላደረገው ምሉዕ በኩለሄ ዓምላክ (Waaqaa) ምስጋና የሚቀርብበት ነው፡፡

የአዲስ ዓመትና የምስጋና ዕለት የሆነው ኢሬቻ የእርቅም በዓል እንደሆነ ይነገራል፤ በመሆኑም ቂም ይዞ ወደ መልካው መሄድ ስለማይቻል የተጣሉ ሰዎች አስቀድመው ካልታረቁ ወደ  ኢሬቻ አይሄዱም።

 

የኢሬቻ መልካ ሁሉም የኦሮሞ ልጆች በመሃከላቸው ያለውን የጎሳ፣ የሃይማኖት፣ የአመለካካት ልዩነት ጥለው የአንድ አባት ልጆች መሆናቸውን የሚገልጹበት የአንድነት ስፍራ በመሆኑ በበዓሉ ላይ ዓምላክን ከማመሰገንና ደስታን ከመግለጽ ውጭ የግል ወይም ቡድናዊ ፍላጎት መግለጽ ነውር  እንደሆነም ይጠቀሳል፡፡

ኢሬቻ ያለልዩነት በአንድነት የሚገለፅበት የምሥጋና፣ የእርቅና የሠላም በዓል ነው።

የቢሾፍቱ ሆራ አርሰዲ ሀይቅ ኢሬቻ አንጋፋና በመላው ኦሮሞዎች ዘንድ በጋራ የሚከበርበት ሲሆን እዚህ  ከተከበረ በኋላ በቀጣይ በሌሎችም በየአካባቢው ባሉ ኃይቆች(መልካዎች) በድምቀት የሚከበር ይሆናል፡፡

Leave a Reply

Your email address will not be published. Required fields are marked *